Ni med cvetjem ni pravice by Miroslav Krlea Lyrics

"Ni med cvetjem ni pravice"
Rekel to je fijolice
Smardlivi terputec
Jalnuš, tvardogutec

"Lepe ti je, lepe ti je
Fijolice dišeče
Kad se pava po stezice
Prek gartlica šeče"
"Teške je nam, teške je nam
Na kokošjoj paši
S prepunčecom, z grintom, s ternom
Žalosnimi pajdaši
Sunčanice, rožmarin
Leha puna georgin
Mačuhica, franciškan
Dišiju kak marcipan"

"Glavobolka, bogi cvet
Glava zna od nje bolet
Kopriva grize, a lopuh
Kak kačje mleko ima duh
Žabnjak, osjak i peršin soldački
Se te plante nečeju ni mački
Kak mozul imaju vonjhu
Kak smardlivi spuriš
Od njih nigdo nigdar je ne imel niš"

"Dok v božje plahtice
Kakti vu zipčice
Isusek mali spi
V cinduli i šašu
V puhlivem jandrašu
V kopitnjaku, v trubentice
Niščega ni"

Zajček, gumbek, bažulek i slak
Čuli su terpuca kak punta se bedak
Pak rekel je gumbek: "Ti si bedak
To je tak vola božja, pak ima biti tak"!

"Ni ja nis roža ni fergismajniht
Ni dijacint, ni holer, ni admiralov cvet!
Ja priklonit sem gumbek, a nis dišeča teja
Pak srečen sem kak gumbek, kad nis Galateja!"

A rekel je terputec: "Slatki vi gosponček
Naj daju mi jen preponizni pardonček
Kajti ja ne klimam sakom kakti zvonček!"
"Vi v gartlicu dišite, kakti mačuhice
A nas pak zlobu vrapci i tice krilatice
Po nama smrade krave i cigan se posce
Na kačino mleko, na zimolezine
Vu plahticam vašim božje dete spi
Na piriku, terpuca ni vrag ne gledi"

"Ak pak če bi tak, da na svetu biti ima tak
Da na jenog krava i cigan se sce
A drugi pak v gartlicu kak admiral diše
Če ima biti tak, naj onda bu tak
A jak, kak jalnuš, gladnuš i bedak
Del si bum za škrilak goreči čerleni mak
Pak nek dojde veter, sivi severnjak!"

"Severec, kozoderec, skunkačov strah i kač
Raznesel bu vre farbe s pisanih vaših gač
A nami bu sejeno, mi tak sme polski drač
Bespuci, terpuci i kravji kolač!"