Ballade by Louise Talma Lyrics

En regardant vers le païs de France
Ung jour m'avint, à Dovre sur la mer
Qu'il me souvint de la doulce plaisance
Que je souloye où-dit païs trouver
Si commençay de cueur 'à souspirer
Combien certes que grant bien me faisoit
De veoir France, que mon cueur amer doit
Je m'avisay que c'estoit non sçavance
De tells soupirs dedens mon cueur garder
Veu que je voy que la voye commence
De bonne paix, qui tous bien peut donner
Pour ce tournay en confort mon penser:
Mais non pourtant mon cueur ne se lassoit
De veoir France, que mon cueur amer doit
Alors chargeay en la nef d'espérance
Tous mes souhaitz, en les priant d'aler
Oultre la mer, san faire demourance
Et à France de me recommander
Or, mous doint Dieu bonne paix sans tarder;
Adonc auray loisir, mais qu'ainsi soit
De veoir France, que mon cueur amer doit
Paix est trésor qu'on ne peut trop louer
Je hé guerre, point ne la doit priser;
Destourbé m'a longtemps, soit tort ou droit
De veoir France, que mon cueur amer doit