Aymi dame de valour by Guillaume de Machaut Lyrics

Aymi! dame de valour
Que j'aim et desir
De vous me vient la dolour
Qui me fait languir

Tres douce creature
Comment puet vo fine douçour
Estre vers moy si dure
Quant mon cuer, mon corps et m'amour
Vous ay donné sans retour
Et sans repentir?
Or me tenez en langour
Dont je criem morir
Aymi! dame

Et tout par enmesure
Gentil dame, pleinne d'onnour
Sui je à desconfiture;
Car onques nе quis deshonnour
Vers vous, ains ay sans sejour
Fait vo dous plaisir
Et fеray sans mauvais tour
Jusques au morir
Aymi! dame de valour
Mais vo douce figure
Vo fine biauté que j'aour
Et vo noble faiture
Parée de plaisant atour
En plour tiennent nuit et jour
Sans joie sentir
Mon cuer qui vit en tristour
Dont ne puet garir
Aymi! dame de valour
Que j'aim et desir
De vous me vient la dolour
Qui me fait languir