Amours me fait desirer by Guillaume de Machaut Lyrics

Amours me fait desirer
Et amer
De cuer si folettement
Que je ne puis esperer
Ne penser
N'ymaginer nullement
Que le dous viaire gent
Qui m'esprent
Me doie joie donner
S'amours ne fait proprement
Telement
Que je l'aie sans rouver

S'ay si dur à endurеr
Que durer
Ne puis miе longuement;
Car en mon cuer vueil celer
Et porter
Ceste amour couvertement
Sans requerre aligement
Qu'à tourment
Vueil miex ma vie finer
Et si n'ay je pensement
Vraiement
Que je l'aie sans rouver
Mais desirs fait embraser
Et doubler
Ceste amour si asprement
Que tout me fait oublier
Ne penser
N'ay fors à li suelement;
Et pour ce amoureusement
Humblement
Langui sans joie gouster
S'en morray, se temprement
Ne s'assent
Que je l'aie sans rouver