Sei Mise Tene Appena by Concetta Cupelli Lyrics

Si v'aggia parlà 'e Franca pe' favore
stateve zitto nun pepetiate!
Sta piccerella nun è comm'all'ate
c'alluccano e picceano a tutte ll'ore.

Tene se' mise e ggià è n'apprettacore:
si v''a pigliate 'mbraccio, appesuliate
certo ca cchiù d''o piso vuje 'a truvate
pecché sta nenna cresce a quarte d'ora.

Na perzeca majateca è 'a faccella
che t''a mangiasse a muorze overamente
si nun penzasse ch'è na piccerella!

E 'o tiempo passa sempe alleramente
quanno staje 'nzieme a chesta pupatella
c'ha fatto schiavo 'o core 'e ogne parente!