Jolly Jankyn by Anonymous Lyrics

Kyrie, so kyrie,
Jankyn syngyt merie,
With Aleison.

As I went on ȝol Day
In owre prosessyon,
Knew I joly Jankyn
By his mery ton,
Kyrieleyson.

Jankyn began the Offys
On þe Yol Day,
And ȝyt me thynkyt it dos me good
So merie gan he say,
'Kyrieleyson'.

Jankyn red þe Pystyl
Full fayre and full wel,
And ȝyt me thinkyt it dos me good
As euere haue I sel,
Kyrieleyson.
Jankyn at the Sanctus
Crakyt a merie note,
And ȝyt me thinkyt it dos me good -
I payid for his cote,
Kyrieleyson.

Jankyn crakit notes
An hunderid on a knot,
And ȝyt he hakkyt hem smallere
Than wortes to þe pot,
Kyrieleyson.

Jankyns at the Angnus
Beryt þe pax-brede:
He twynkelid but said nowt,
And on myn fot he trede,
Kyrieleyson.

Benedicamus Domino,
Cryst fro schame me schylde:
Deo gracias, therto -
Alas! I go with chylde,
Kyrieleyson.